Thursday 21st of September | २०७४ असोज ५ बिहिबार

न्यूज अभियान
हरेक खबर विशेष खबर

सरकारी कार्यालयमा दरबन्दीअनुसार १२१ जनाको पद रिक्त

न्यूजअभियान | प्रकाशित मिति : २०७३ असोज १० सोमबार
newsabhiyan

लिबाङ (रोल्पा), १० असोज । रोल्पा जिल्लाका १० वटा सरकारी कार्यालयमा मात्र दरबन्दीअनुसार ११४ जनाको पद रिक्त रहेको सम्बन्धित कार्यालयले जनाएका छन् ।

लामो समयदेखि दरबन्दीअनुसार कर्मचारीको पदपूर्ति हुन नसक्दा हरेक सेवा प्रवाहमा कठिनाइ हुने गरेको कार्यालय प्रमुखहरुको गुनासो छ ।

“हामीले हाम्रा कार्यालयबाट सकेजति सेवा प्रवाह गरिरहेका छौँ तर रिक्त पद पूर्ति हुनसके सेवाग्राहीलाई अझ सहज रुपबाट सेवा प्रदान गर्न सकिने थियो” – प्रहरी नायब उपरीक्षक रामप्रसाद घर्तीमगरले भन्नुभयो ।

उहाँका अनुसार जिप्रका रोल्पालगायत मातहतका एकाइमा ४४ जनाको पद रिक्त रहेको छ । जसअन्तर्गत प्रहरी निरीक्षक दुई, प्रहरी सहायक निरीक्षक तीन, प्रहरी हवल्दार १८ र प्रहरी जवान २१ गरी ४४ जनाको पद रिक्त रहेको हो ।

यसैगरी जिल्ला स्वास्थ्य कार्यालय रोल्पामा जनस्वास्थ्य अधिकृत एक, मेडिकल रेकर्डर एक, प्यारामेडिक्स १२ र कार्यालय सहयोगी चार गरी जम्मा १८ जना कर्मचारीको पद रिक्त रहेको जिल्ला स्वास्थ्य कार्यालयका प्रमुख डा भवानीप्रसाद शर्माले जानकारी दिनुभयो ।

यस्तै जिल्ला कृषि विकास कार्यालयमा बागवानी विकास अधिकृत एक, योजना अधिकृत दुई, प्राविधिक सहायक पाँच, नायब प्राविधिक सहायक तीन र कार्यालय सहयोगी तीन गरी जम्मा १४ जनाको पद रिक्त रहेको कार्यालयका प्राविधिक सहायक महेन्द्र पुनले जानकारी दिनुभयो ।

यसैगरी जिल्ला शिक्षा कार्यालयमा शाखा अधिकृत दुई, विद्यालय निरीक्षक चार, लेखा अधिकृत एक, प्राविधिक सहायक तीन गरी जम्मा १० जनाको पद रिक्त रहेको जिल्ला शिक्षा अधिकारी चिरञ्जीवी पौडेलले जानकारी दिनुभयो ।

त्यसैगरी जिविसको कार्यालय रोल्पा र मातहतका गाविसका कार्यालयमा पनि करिब एक वर्षदेखि योजना अनुगमन तथा प्रशासकीय अधिकृत एकसहित अन्य सातजना गाविस सचिवको पद रिक्त रहेको स्थानीय विकास अधिकारी सुशील वैद्यले जानकारी दिनुभएको छ ।

यस्तै जिल्ला वन कार्यालय रोल्पामा फरेस्टर चार, खरिदार एक, वन रक्षक दुई र सहायक वन अधिकृत तीन गरी १० जनाको पद रिक्त रहेको जिल्ला वन कार्यालय रोल्पाका निमित्त जिल्ला वन अधिकृत भीमबहादुर कालीकोटेले जानकारी दिनुभयो ।

जिल्ला पशु सेवा कार्यालय रोल्पामा अधिकृत एक, नायब पशु सेवा तथा नायब पशु स्वास्थ्य प्राविधिक छ गरी जम्मा सातजनाको पद रिक्त रहेको जिल्ला पशु सेवा कार्यालय रोल्पाका कार्यालय प्रमुख नन्दलाल चौधरीले जानकारी दिनुभयो ।

यसैगरी जिल्ला प्राविधिक कार्यालय रोल्पामा इन्जिनियर दुई, असिस्टेन्ट इन्जिनियर दुई र कम्प्युटर अप्रेटर गरी पाँचजनाको पद रिक्त रहेको छ ।
यसैगरी जिल्ला भू–संरक्षण कार्यालयमा भूसंरक्षक सहायक दुईजनाको पद रिक्त रहेको कार्यालय प्रमुख प्रदीपकुमार मिश्रले जानकारी दिनुभयो ।

यीबाहेक अन्य धेरै कार्यालयमा पनि दरबन्दीअनुसार पदपूर्ति हुन सकिरहेको छैन । सभामुख, उपराष्ट्रपति तथा उपप्रधानमन्त्रीको जिल्लाका कार्यालयमा यस्तो अवस्था छ भने अन्य जिल्लाको अवस्था कस्तो होला सेवाग्राहीको प्रश्न छ । रासस
 

न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुकट्वीटर मार्फत जोडिनुहोस् ।

न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan