न्यूज अभियान
हरेक खबर विशेष खबर

धादिङ, २१ असोजः धादिङबेँसीमा सञ्चालित दुईदिने आँखा शिविरमा एक सय तीन जनाको शल्यक्रिया गरिएको छ । शिविरमा मोतीबिन्दु र आँखामा मासु पलाउने समस्या भएका बिरामीको निःशुल्क तथा सहुलियत शुल्कमा शल्यक्रिया गरिएको हो ।

    तिलगङ्गा आँखा प्रतिष्ठान, काठमाडौँ र तिलगङ्गा सर्जिकल सामुदायिक आँखा केन्द्र धादिङको आयोजनामा यही असोज २० र २१ गते सञ्चालित उक्त शिविरमा मोतीबिन्दु भएका ७० जनाको ‘फेको’ र २७ जनाको ‘एसआइसिएस’ प्रविधिबाट शल्यक्रिया गरिएको केन्द्रका प्रमुख सुपेन्द्र ताम्राकारले जानकारी दिनुभयो । आँखामा मासु पलाउने समस्या भएका ६ जनाको समेत शल्यक्रिया गरिएको उहाँले बताउनुभयो ।

    शिविरमा एसआइसिएस प्रविधिबाट गरिने मोतीबिन्दुको शल्यक्रिया निःशुल्क तथा फेको प्रविधि र प्टेरिजियमको शल्यक्रिया सहुलियत शुल्कमा गरिएको प्रमुख ताम्राकारले जानकारी दिनुभयो । शिविरबाट विशेषगरी नीलकण्ठ नगरपालिका, ज्वालामुखी गाउँपालिका, नेत्रावती डबजोङ र खनियाबास गाउँपालिकाका बिरामीले सेवा लिएका थिए ।

    यसअघि गत भदौ महिनामा सञ्चालन गर्ने तय भएको शिविर बाढी पहिरोका कारण यातायात अवरुद्ध भएपछि स्थगित गरिएको थियो । केन्द्रका प्रमुख ताम्राकारका अनुसार मोतीबिन्दु उमेर बढ्दै जाँदा मात्र देखिने समस्या होइन, आँखामा चोटपटक लाग्दा तथा बालबालिकामा जन्मजात रूपमा समेत देखिन सक्छ । आँखासम्बन्धी जटिल समस्या देखिए विशेषज्ञ स्वास्थ्य संस्थामा उपचार गराउन, आँखालाई चोटपटकबाट जोगाउन तथा स्वस्थ जीवनशैली अपनाउन उहाँले सुझाव दिनुभयो । शिविर सञ्चालनका लागि ‘दी फ्रेड हलोज फाउन्डेसन’ले आर्थिक सहयोग गरेको हो ।