न्यूज अभियान
हरेक खबर विशेष खबर

लमजुङ, १९ असोजः उपचारका नयाँ तथा विशिष्टीकृत सेवा थपिँदै गएपछि लमजुङको बेँसीसहर नगरपालिका-८ स्थित प्रदेश अस्पतालमा सेवाग्राहीको चाप बढ्दै गएको छ । जटिल उपचार तथा शल्यक्रिया हुन थालेपछि लमजुङसँगै तनहुँ, मनाङलगायत जिल्लाबाट पनि उपचारका लागि सेवाग्राही आउन थालेका छन् ।

    अस्पतालका सूचना अधिकारी अनिल रेग्मीका अनुसार सेवा विस्तारसँगै अस्पतालमा आउने सेवाग्राहीको सङ्ख्या उल्लेख्य बढेको छ । पहिले बहिरङ्ग (ओपिडी) मा दैनिक २०० देखि २५० जना सेवाग्राही आउने गरेकामा अहिले ४५० जनासम्म आउने गरेका उहाँले जानकारी दिनुभयो ।

    आकस्मिक, ओपिडीलगायत सबै सेवा जोड्दा दैनिक ६०० सम्म सेवाग्राहीले अस्पतालबाट सेवा लिने गरेका सूचना अधिकारी रेग्मीले जानकारी दिनुभयो । उहाँका अनुसार चालु आर्थिक वर्षको साउन र भदौमा १७ हजार २३ जनाले अस्पतालबाट सेवा लिएका छन् ।

    अस्पताल व्यवस्थापक प्रमिला ढकालका अनुसार पछिल्ला चार आर्थिक वर्षमा अस्पतालबाट सेवा लिनेको सङ्ख्या निरन्तर बढिरहेको छ । आव २०७९/८० मा ७५ हजार ६२२, आव २०८०/८१ मा ९१ हजार ५४, आव २०८१/८२ मा एक लाख १३ हजार ८३७ र आव २०८२/८३ मा एक लाख १५ हजार ३०८ ले सेवा लिएका उहाँले जानकारी दिनुभयो ।

    सेवाग्राहीको सङ्ख्या बढेसँगै अस्पतालका प्रयोगशाला तथा निदानात्मक सेवाको प्रयोगमा समेत वृद्धि भएको छ । आव २०७९/८० मा ३३ हजार ८३७ जनाले प्रयोगशाला सेवा लिएकामा आव २०८२/८३ मा ४३ हजार १५५ पुगेको छ । सोही अवधिमा एक्स-रे सेवा १६ हजार ८३४ बाट बढेर २५ हजार ३४१, अल्ट्रासोनोग्राफी सात हजार ५२२ बाट बढेर १२ हजार ७३१ र इसिजी सेवा चार हजार १८६ बाट बढेर ११ हजार ५५० पुगेको व्यवस्थापक प्रमिला ढकालले जानकारी दिनुभयो ।

    आकस्मिकतर्फ सेवा लिनेको सङ्ख्या पनि १० हजार १३२ बाट बढेर ११ हजार ३०७ पुगेको अस्पतालले जनाएको छ । जिल्लामै उपचारका विभिन्न सेवा उपलब्ध हुन थालेपछि अन्यत्र जानुपर्ने बाध्यता कम हुनुका साथै सेवाग्राहीको समय र उपचार खर्चसमेत बचत भएको अस्पताल व्यवस्थापक प्रमिला ढकालको भनाइ छ ।

    अस्पतालले पछिल्लो समय उपचारसँगै रोकथाम तथा विशेषज्ञ सेवाको विस्तारलाई पनि प्राथमिकता दिएको छ । गत आर्थिक वर्षमा लमजुङमा पहिलोपटक रेबिजविरुद्धको मानव इम्युनोग्लोबुलिन सेवा सुरु गर्नुका साथै इन्डोस्कोपी, सिस्टोस्कोपी, म्याक्सिलोफेसियल शल्यक्रिया, छालारोग तथा नाक, कान तथा घाँटी सेवाको विस्तार गरिएको उहाँले जानकारी दिनुभयो । ल्याप्रोस्कोपिक शल्यक्रिया, फिजियोथेरापी र जैवचिकित्सकीय प्रयोगशाला सेवासमेत विस्तार गरिएको अस्पतालले जनाएको छ ।

    त्यस्तै, क्यान्सर परीक्षण, गर्भवती तथा सुत्केरीको स्वास्थ्य परामर्श, नवजात शिशुमा जन्मजात रोग पहिचान, ज्येष्ठ नागरिक तथा बालबालिकाका लागि निःशुल्क परीक्षण तथा स्वास्थ्य सेवा र विपन्न तथा बेवारिसे व्यक्तिका लागि निःशुल्क उपचारलगायत कार्यक्रम सञ्चालन गरिएको छ ।

    दूरचिकित्सा सेवा, स्वास्थ्य शिविर, रक्तदान, विपद् व्यवस्थापनसम्बन्धी अभ्यास तथा तालिम र आकस्मिक अवलोकन कक्षको व्यवस्थाले अस्पतालको सेवा क्षमता थप विस्तार भएको जनाइएको छ । सेवा विस्तारसँगै सेवाग्राहीको सङ्ख्या बढ्दै गएपछि अस्पतालको जनशक्ति, पूर्वाधार तथा व्यवस्थापनमा समेत थप चाप परेको छ । बढ्दो सेवाग्राहीलाई सहज र प्रभावकारी स्वास्थ्य सेवा उपलब्ध गराउन आवश्यक जनशक्ति, पूर्वाधार तथा व्यवस्थापनलाई थप सुदृढ बनाउनुपर्ने सरोकार भएकाहरूको भनाइ छ ।