न्यूज अभियान
हरेक खबर विशेष खबर

काठमाडौं । नेपाली कांग्रेसका सभापति गगन थापाले राष्ट्रिय विपत्ति र पीडाको संवेदनशील परिस्थितिमा यस वर्षको विजयादशमी मनाउनुपरेको उल्लेख गर्दै दुःखमा परेका परिवारलाई सहयोग गर्न र खुसी बाँड्न सबैलाई आग्रह गरेका छन्।

विजयादशमीको अवसरमा स्वदेश तथा विदेशमा रहेका सम्पूर्ण नेपालीलाई शुभकामना व्यक्त गर्दै सभापति थापाले चाडपर्वको खुसी आफ्नो घरआँगनमा मात्रै सीमित नराख्न आग्रह गरेका हुन्।
उनले विपत्तिका कारण धेरै परिवार दुःख, पीडा र कठिनाइमा रहेको उल्लेख गर्दै यस्तो संवेदनशील समयमा एकअर्काको पीडा बुझ्ने, सहयोग गर्ने र सहारा बन्ने भावना आवश्यक रहेको बताएका छन्।

“चाडपर्वको खुसी केवल आफ्नो घरआँगनमा सीमित नरहोस्। दुःखमा परेका परिवारको पीडामा थोरै भए पनि मलम लगाउन सकौँ, आफ्नो खुसी बाँड्न सकौँ र एकअर्काको सहारा बन्न सकौँ,” थापाले शुभकामना सन्देशमा भनेका छन्।

उनका अनुसार विजयादशमी केवल उत्सव र उल्लासको पर्व मात्र नभई मानवीय संवेदना, आपसी सद्भाव र सामाजिक एकतालाई थप बलियो बनाउने अवसर पनि हो। विपत्तिको कठिन घडीमा पीडित परिवारप्रति सहानुभूति व्यक्त गर्नुका साथै सक्दो सहयोग गर्नु सबैको साझा जिम्मेवारी भएको उनको सन्देश छ।
सभापति थापाले यस वर्षको विजयादशमीले प्रत्येक व्यक्तिलाई आफ्नै कमजोरीमाथि विजय प्राप्त गर्ने आत्मबल प्रदान गरोस् भन्ने कामना गरेका छन्। साथै, अरूको दुःख र पीडा बुझ्ने संवेदना तथा समाजलाई जोड्ने सद्भावको भावना अझ सुदृढ बन्नुपर्नेमा जोड दिएका छन्।

उनले सबै नेपालीमा सुख, शान्ति, सुस्वास्थ्य र समृद्धिको कामना गर्दै विजयादशमीको हार्दिक मंगलमय शुभकामना व्यक्त गरेका छन्।
विपत्तिको घाउमा मलम, दुःखमा साथ र खुसीमा साझेदारी—यस वर्षको दसैँमा सभापति थापाको शुभकामना सन्देशले मानवीय संवेदना र सामाजिक एकताको महत्त्वलाई जोड दिएको छ।