न्यूज अभियान
हरेक खबर विशेष खबर

ब्राजिलका राष्ट्रपतीय उम्मेदवार फ्लाभियो बोल्सोनारोलाई इजरायल भ्रमण गर्न इजरायली प्रधानमन्त्री बेन्जामिन नेतन्याहुले आमन्त्रण गर्नुभएको छ। 

दुई देशबीचको ‘गहिरो मित्रता नवीकरण’ गर्ने लक्ष्यसहित यो कदम चालिएको उहाँको कार्यालयले शुक्रबार बताएको छ ।

दक्षिणपन्थी बोल्सोनारो वर्तमान वामपन्थी राष्ट्रपति लुइज इनासियो लुला दा सिल्भाविरुद्धको चुनावी प्रतिस्पर्धामा अगाडि रहेको सर्वेक्षणमा देखिएको छ । उहाँको जितले ल्याटिन अमेरिकाको सबैभन्दा बण्ी जनसङ्ख्या भएको ब्राजिलमा इजरायलप्रति अझ सकारात्मक दृष्टिकोण ल्याउनेछ ।

“प्रधानमन्त्री बेन्जामिन नेतन्याहुले हिजो राति ब्राजिलका राष्ट्रपतीय उम्मेदवार फ्लाभियो बोल्सोनारोसँग कुराकानी गर्दै राष्ट्रपतीय निर्वाचनको पहिलो चरणमा उहाँको उपलब्धिप्रति बधाई दिनुभएको छ,” प्रधानमन्त्री नेतन्याहूको कार्यालयले विज्ञप्तिमा भनेको छ । बोल्सोनारोका भाइ एडुआर्दो पनि यस कुराकानीमा सहभागी हुनुभएको थियो । 

“प्रधानमन्त्रीले बोल्सोनारोलाई इजरायल भ्रमण गर्न आमन्त्रण गर्नुभयो र उहाँले पनि आफ्नो तर्फबाट प्रधानमन्त्रीलाई ब्राजिल भ्रमण गर्न आमन्त्रण गर्नुभयो ।”

“दुवै पक्ष दक्षिण अमेरिकी देशहरूसँग इजरायलको सम्बन्धमा भइरहेको परिवर्तनको अंशका रूपमा दुई देशबीचको गहिरो मित्रता नवीकरण गर्न चाहन्छन्,” विज्ञप्तिमा थपिएको छ।

ब्राजिलियालीहरू अक्टोबर २५ मा दोस्रो चरणको राष्ट्रपतीय निर्वाचनमा मतदान गर्नेछन् भने नेतन्याहुले पनि अक्टोबर २७ मा इजरायलको आमनिर्वाचनमा मतदानको सामना गर्नुहुनेछ । 

हालैका वर्षहरूमा ल्याटिन अमेरिकाभरि इजरायलप्रति सकारात्मक दृष्टिकोण राख्ने अर्जेन्टिना र कोलम्बियाजस्ता धेरै दक्षिणपन्थी नेताहरूले निर्वाचन जितेका छन् । 

निर्वाचनमा होमिएका ४५ वर्षीय बोल्सोनारो पूर्व राष्ट्रपति जाइर बोल्सोनारोका जेठा छोरा हुनुहुन्छ । जाइर बोल्सोनारो सन् २०२२ मा ब्राजिलको अन्तिम निर्वाचन हारेपछि कू योजना बनाएको आरोपमा नजरबन्दमा राखिनुभएको छ । 

युवा बोल्सोनारो बिहीबारका सर्वेक्षणमा अगाडि हुनुहुन्छ । ब्राजिलको डाटाफोल्हा नामक सर्वेक्षण संस्थाले सिनेटर बोल्सोनारोलाई ५२ प्रतिशत र वर्तमान् राष्ट्रपति लुलालाई ४८ प्रतिशत दिएको थियो ।