न्यूज अभियान
हरेक खबर विशेष खबर

दमौली (तनहुँ), १० कात्तिकः प्रसिद्ध धार्मिकस्थल मुक्तिनाथबाट सुरु भएको मेची महाकाली गजेन्द्रमोक्ष नारायण मुक्तिनाथ रथयात्रा आज तनहुँको सदरमुकाम दमौली आइपुगेको छ । सनातन धर्मको संरक्षण, आध्यात्मिक चेतनाको विस्तार र धार्मिक जागरण अभिवृद्धि गर्ने उद्देश्य राखेर आइतबारदेखि सुरु भएको रथयात्रा आज दमौली आइपुगेको हो । 

    दमौली आइपुगेको रथयात्रालाई व्यास नगरपालिका–३ प्रशासनचोकमा विशेष कार्यक्रम आयोजना गरी स्वागत गरिएको छ । स्वागत कार्यक्रममा व्यास नगरपालिकाका प्रमुख वैकुण्ठ न्यौपानेले धार्मिक जागरण अभिवृद्धिका लागि व्यास नगरपालिका सधैँ क्रियाशील रहेको बताउनुभयो । नगरप्रमुख न्यौपानेले व्यासको जन्मभूमि दमौली र मुक्तिनाथधामलाई धार्मिक पर्यटनका माध्यमबाट जोड्न सकिए यस क्षेत्रको धार्मिक विकासमा टेवा पुग्ने उल्लेख गर्नुभयो । 

    आम नेपालीमा धार्मिक आस्था, आध्यात्मिक चेतना र एकताको भावना अभिवृद्धि गर्ने उद्देश्यले रथयात्रा आयोजना गरिएको मुक्तिनाथ बाबाका उत्तराधिकारी स्वामी श्रीकृष्ण प्रपन्नाचार्यले जानकारी दिनुभयो । 

    दमौलीबाट डुम्रे–मुग्लिन–धादिङ–थानकोट–कलङ्की–स्वयम्भू–बालाजु र चक्रपथ हुँदै गोल्फुटारस्थित श्रीमुक्तिनाथ बाबा सेवाश्रम पुगेर रथयात्रा विश्राम गर्नेछ । बुधबार काठमाडौँ नगर परिक्रमा गरी श्रीपञ्चमहालक्ष्मी मन्दिर र श्रीवनधाम, भक्तपुरमा रात्रि विश्राम गर्ने कार्यतालिका छ ।

    कात्तिक महिनाभर सञ्चालन हुने रथयात्रा सकिएपछि आगामी मङ्सिर १ देखि २९ गतेसम्म त्रिवेणीधाममा गजेन्द्रमोक्ष नारायण वैभव विराट महायज्ञको आयोजना गरिएको छ । महायज्ञमा विशाल धन्याचलसहित अष्टाच, श्रीराम अभिमन्त्रित चामलका साथमा चार वेद १८ पुराणसहित वैदिक पारायण, हवन, कथाप्रवचन, दैनिक १०८ कन्यापुजन, बटुकपुजनलगायतका कार्यक्रम आयोजना गरिनेछ ।