Tuesday 17th of November | २०८३ मङ्सिर १ मंगलबार

न्यूज अभियान
हरेक खबर विशेष खबर

बहुउद्देश्यीय कभर्ड हल निर्माण गर्न देउसी, भैलो

न्यूजअभियान | प्रकाशित मिति : २०८३ मङ्सिर १ मंगलबार | रासस
newsabhiyan

 

खोटाङ, १ मङ्सिरः दिक्तेल रूपाकोट मझुवागढी नगरपालिका–१२ जालपास्थित जालपा माध्यमिक विद्यालयले ‘बहुउद्देश्यीय कभर्ड हल’ निर्माण गर्न देउसी, भैलो कार्यक्रम सञ्चालन गरिरहेको छ । 

 

नेपालीको दोस्रो ठूलो चाड तिहारको अवसर पारेर गत कात्तिक १९ गतेदेखि सुरु गरेको देउसी, भैलो कार्यक्रम यही मङ्िसर–५ गतेसम्म सञ्चालन हुने विद्यालयले जनाएको छ । 

 

जिल्लाको प्रमुख व्यापारिक केन्द्र दिक्तेल बजारको विभिन्न ठाउँमा गत कात्तिक २९ गते आइतबार आयोजना गरिएको कार्यक्रममा रु सात लाख सात हजार सङ्कलन भएको विद्यालयका प्रधानाध्यापक दिलबहादुर राईले जानकारी दिनुभयो । 

 

यसअघि गत कात्तिक–१९ गतेदेखि २२ गतेसम्म तराईका विभिन्न ठाउँमा आयोजना गरिएको देउसी, भैलो कार्यक्रममा रु १८ लाख सङ्कलन भएको छ ।

 

सांस्कृतिक कार्यक्रमसहितको देउसी, भैलो कार्यक्रम उदयपुरको बसाहा, मोरङको विराटनगर, लेटाङ, सुनसरीको धरान, इटहरी र तरहरामा आयोजना गरिएको थियो । 

 

त्यसैगरी, गत कात्तिक २० देखि २२ गतेसम्म जालपामा आयोजना गरिएको देउसीभैलो कार्यक्रममा रु एक लाख ७० हजार रकम सङ्कलन भएको छ । 

 

विद्यालयको प्राङ्गणमा यही मङ्सिर–५ गते औपचारिक रुपमा समापन गरिने देउसीभैलो कार्यक्रममा हालसम्म रु २६ लाख ७७ हजार सङ्कलन भएको विद्यालयले जनाएको छ । फरकफरक तीन टोली बनाएर देउसीभैलो कार्यक्रम सुरु गरिएको विद्यालयले एक टोलीले गाउँ तथा दुई टोलीले पूर्वी सहरमा कार्यक्रम सञ्चालन गरेको हो । 

 

विद्यालयले निर्माण गर्न लागेको बहुउद्देश्यीय कभर्ड हलका लागि करिब रु ५० लाख खर्च लाग्ने अनुमान गरिएको विद्यालय व्यवस्थापन समितिका अध्यक्ष सार्जन राईले जानकारी दिनुभएको छ ।

 

“देउसी, भैलोबाट सङ्कलन भएको रकम र सङ्घ, प्रदेश तथा स्थानीय तहगरी तीनै तहको सरकारलाई कर्भड हल निर्माणका लागि औपचारिक रुपमा अनुरोध गर्ने योजना बनाइएको छ । 

 

खेलकुदका कार्यक्रमले विद्यार्थीको पढाइसँगै सर्वाङ्गीण विकासमा ठूलो सहयोग पुग्ने गर्छ”, उहाँले भन्नुभयो, “विद्यालयमा विद्यार्थीका लागि आवश्यक खेलमैदान तथा कार्यक्रम सञ्चालन गर्ने सभाहल छैन । दान, दक्षिणा सङ्कलनबाटै बहुउद्देश्यीय कर्भड हल निर्माण गर्ने योजनासहित यस वर्षको तिहारमा देउसीभैलो कार्यक्रम आयोजना गरिएको हो ।”

 

विद्यालयले सञ्चालन गरेको देउसी, भैलोमा जालपाका शिक्षक, विद्यार्थी, अभिभावक तथा बूढापाका सहभागी छन् । दान/दक्षिणा सङ्कलन तथा सङ्घसंस्थाको सहयोगमा जम्मा भएको रकमले निर्माण गरिने बहुउद्देश्यीय कभर्ड हलमा सांस्कृतिक कार्यक्रमका साथै कबड्डी, मार्सल आर्ट, भलिबल, बास्केटबल, ब्याटमिन्टन र टेबलटेनिस खेल सञ्चालन गरिने विद्यालयले जनाएको छ । 

यो खबर पढेर तपाईलाई कस्तो महसुस भयो ?

न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुक र ट्वीटर मार्फत जोडिनुहोस् ।


न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan