न्यूज अभियान
हरेक खबर विशेष खबर

कोलम्बो, २१ असोज : श्रीलङ्काका पूर्वराष्ट्रपति महिन्दा राजापाक्षकी पत्नी तथा पूर्व प्रथम महिला शिरन्ती राजापाक्षलाई परोपकारी संस्थाले बाल अस्पतालका लागि सङ्कलन गरेको चन्दा रकम दुरुपयोग गरेको आरोपमा बुधबार पक्राउ गरिएको छ ।

राष्ट्रपति अनुरा कुमार दिसानायकेको सरकारले लामो समयदेखि निष्क्रिय रहेको भ्रष्टाचारसम्बन्धी अनुसन्धान पुनः अघि बढाउने क्रममा उहाँलाई पक्राउ गरेको हो

। ७३ वर्षीया शिरन्तीलाई कोलम्बोमा पक्राउ गरी मजिस्ट्रेटसमक्ष उपस्थित गराउने तयारी गरिएको घूसखोरी वा भ्रष्टाचारसम्बन्धी आरोपको अनुसन्धान गर्ने आयोग (सिआइएबीओसी) ले जनाएको छ ।

प्रहरीका अनुसार स्थानीय क्यान्सर अस्पतालका लागि पिइटी स्क्यानर खरिद गर्न उहाँको सिरिलिया सविया च्यारिटीले सङ्कलन गरेको करिब एक करोड रुपैयाँ अर्थात् ३० हजार ३०० अमेरिकी डलर बराबरको रकमबारे अनुसन्धान भइरहेको छ ।

अनुसन्धानकर्ताहरूले उक्त स्क्यानर चिनियाँ सरकारले यसअघि नै दान गरिसकेको भए पनि परोपकारी संस्थाले चन्दा सङ्कलन जारी राखेको र रकम दुरुपयोग गरेको आरोप लगाएका छन् । शिरन्तीले भने आरोप अस्वीकार गर्दै आफूले कुनै गलत काम नगरेको बताउनुभएको छ ।

उपचारका लागि सेप्टेम्बर १६ मा सिङ्गापुर जानुभएकी उहाँ अदालतमा गिरफ्तारी रोक्न निवेदन परेपछि सोमबार श्रीलङ्का फर्किनुभएको थियो । उहाँको अग्रिम जमानतसम्बन्धी सुनुवाइ अक्टोबर १२ का लागि तोकिएको छ ।

राजापाक्ष परिवारका अन्य सदस्यसमेत कानूनी समस्यामा छन् । पूर्व प्रथम महिलाका जेठा छोरा तथा विपक्षी सांसद नमल राजापाक्ष सन् २०१३ मा भएको एयरबस विमान खरिद सम्झौतासम्बन्धी अभियोगमा हिरासतमा हुनुहुन्छ । राजापाक्ष परिवारले भ्रष्टाचारका आरोप अस्वीकार गर्दै आफूहरूमाथिको कारबाही राजनीतिक उद्देश्यबाट प्रेरित भएको दाबी गर्दै आएको छ ।

महिन्दा राजापाक्षले सन् २००५ देखि २०१५ सम्म राष्ट्रपतिको जिम्मेवारी सम्हाल्नुभएको थियो । सन् २०२२ को व्यापक विरोध प्रदर्शनपछि उहाँका भाइ गोताबाया राजापाक्ष राष्ट्रपतिबाट हट्नुपरेसँगै परिवारको राजनीतिक प्रभाव कमजोर भए पनि महिन्दा अझै श्रीलङ्काका प्रभावशाली राजनीतिक व्यक्तित्वमध्ये रहनुभएको छ ।