न्यूज अभियान
हरेक खबर विशेष खबर

लेगोस, नाइजेरिया।
भोटेकोशी बाढीबाट प्रभावित नेपाली परिवारको राहत तथा पुनःस्थापनाका लागि अफ्रिकामा रहेका गैरआवासीय नेपाली संघ (एनआरएनए) का राष्ट्रिय समन्वय परिषद्हरुको सक्रियतामा नेपाली समुदाय, नेपालका शुभचिन्तक तथा विभिन्न औद्योगिक र व्यावसायिक प्रतिष्ठानहरू बाट  उल्लेखनीय सहयोग जुटेको छ। अफ्रिकाबाट प्रधानमन्त्री राहत कोषमा हालसम्म २ करोड ११ लाख २३ हजार रुपैयाँ नगद जम्मा गरिएको छ भने ३५ लाख रुपैयाँभन्दा बढी मूल्यका राहत सामग्री प्रभावित परिवारलाई वितरण गरिएको छ।
अफ्रिकामा रहेका नेपाली समुदाय र नेपालप्रति सद्भाव राख्ने व्यक्ति तथा संस्थाहरूले मातृभूमिमा आइपरेको विपत्तिमा सहयोग गर्ने उद्देश्यले आर्थिक तथा भौतिक राहत जुटाएका हुन्।
नाइजेरियाबाट उल्लेखनीय योगदान
एनआरएनए नाइजेरियाको पहलमा नाइजेरियामा रहेका नेपाली समुदाय, नेपालका शुभचिन्तक तथा औद्योगिक र व्यावसायिक प्रतिष्ठानहरूबाट संकलित ७७ लाख रुपैयाँको चेक गत महिना नेपालका अर्थमन्त्रीमार्फत प्रधानमन्त्री राहत कोषमा जम्मा हुने गरी हस्तान्तरण गरिएको थियो।
सोही अवसरमा एनआरएनए घानाले पनि प्रधानमन्त्री राहत कोषका लागि ३ लाख रुपैयाँको चेक अर्थमन्त्रीलाई हस्तान्तरण गरेको थियो।
यसै अभियानमा नाइजेरियाको प्रतिष्ठित औद्योगिक कम्पनी स्टर्लिङ आयल एक्सप्लोरेसन एन्ड इनर्जी प्रोडक्सन कम्पनी लिमिटेड (एसईईपीसीओ) ले थप ६१ हजार २३६ अमेरिकी डलर अर्थात् करिब ९३ लाख रुपैयाँ सहयोग  गरेको छ। उक्त रकम प्रधानमन्त्री राहत कोषका लागि हिमालयन बैंक लिमिटेडको खातामा जम्मा गरिएको हो।

एनआरएनए नाइजेरियाको पहलमा जुटेको यस सहयोगले नेपालका बाढीपीडितलाई राहत उपलब्ध गराउने अभियानमा निजी क्षेत्रको महत्त्वपूर्ण सहभागिता देखाएको एनआरएनएका पुर्व कोषाध्यक्ष हिक्मत थापाले बताउनु भएको छ । उहाँका अनुसार 
अफ्रिकाका विभिन्न देशबाट सहयोग
अफ्रिकाका विभिन्न देशमा रहेका एनआरएनएका राष्ट्रिय समन्वय परिषद्हरूले पनि राहत अभियानमा योगदान दिएका छन्। उपलब्ध विवरणअनुसार प्रजातान्त्रिक गणतन्त्र कङ्गोबाट १३ लाख रुपैयाँ, तान्जानियाबाट २ लाख ५० हजार रुपैयाँ, दक्षिण अफ्रिकाबाट ६ लाख रुपैयाँ, केन्याबाट ९ लाख २३ हजार रुपैयाँ र बोत्स्वानाबाट ५० हजार रुपैयाँ सहयोग जुटाइएको छ।
यी देशमा रहेका नेपाली समुदाय तथा एनआरएनएका शाखाहरूले बैंकिङ माध्यमबाट सहयोग नेपाल पठाएका छन्। अन्य अफ्रिकी देशमा रहेका नेपाली समुदायबाट समेत सहयोग संकलन र हस्तान्तरणको क्रम जारी रहेको छ।

३५ लाखभन्दा बढीका राहत सामग्री वितरण

नगद सहयोगका अतिरिक्त एनआरएनए युगान्डाले ३५ लाख रुपैयाँभन्दा बढी मूल्यका टेन्ट, ग्यास सिलिन्डर र चुल्हो प्रभावित क्षेत्रमा पुर्‍याएर वितरण गरेको छ। यसबाट विपत्तिमा परेका परिवारलाई तत्काल आवश्यक पर्ने सामग्री उपलब्ध गराउन सहयोग पुगेको छ।
राहत अभियानमा नगद सहयोगका साथै प्रभावित परिवारको दैनिक जीवन सहज बनाउन आवश्यक सामग्री वितरणलाई पनि प्राथमिकता दिइएको छ।

विदेशमा रहे पनि मातृभूमिप्रतिको जिम्मेवारी

नेपालबाट टाढा रहेर अफ्रिकाका विभिन्न देशमा व्यवसाय, रोजगारी तथा अन्य पेसामा संलग्न नेपालीहरूले मातृभूमिमा आइपरेको विपत्तिमा एकजुट भएर सहयोग जुटाएका छन्। यस अभियानमा नेपाली समुदायसँगै नेपालका शुभचिन्तक तथा औद्योगिक र व्यावसायिक प्रतिष्ठानहरूको सहभागिताले अन्तरदेशीय मानवीय सहकार्यको उदाहरण प्रस्तुत गरेको छ।
प्रधानमन्त्री राहत कोषमा जम्मा भएको २ करोड ११ लाख २३ हजार रुपैयाँ नगद सहयोग र ३५ लाख रुपैयाँभन्दा बढी मूल्यका राहत सामग्रीले बाढीपीडितलाई राहत पुर्‍याउने अभियानमा अफ्रिकामा रहेका नेपालीहरूको महत्त्वपूर्ण योगदानलाई प्रतिबिम्बित गरेको छ।
अफ्रिकाका एनआरएनए शाखा तथा नेपाली समुदायले थप सहयोग जुटाउने क्रम जारी राखेका छन्। विपत्तिका बेला मातृभूमिलाई सहयोग गर्ने यस अभियानले विदेशमा रहेका नेपालीहरूको एकता, सामाजिक उत्तरदायित्व र मानवीय संवेदनालाई उजागर गरेको छ।