न्यूज अभियान
हरेक खबर विशेष खबर

काठमाडौँ, २३ कात्तिकः तेस्रो संस्करणको नेपाल प्रिमियर लिग (एनपिएल) अन्तर्गत चितवन राइनोजले जवाफी व्याटिङ गरिरहेको छ । 
    यसअघिको खेलमा काठमाण्डु गोर्खाजले चितवनलाई १८१ रनको लक्ष्य दिएको थियो । यसअघि कीर्तिपुरस्थित त्रिभुवन अन्तरराष्ट्रिय क्रिकेट मैदानमा टस हारेर ब्याटिङको निम्तो पाएको काठमाण्डुले निर्धारित २० ओभरमा आठ विकेट गुमाएर १८० रन बनाएको थियो ।

    काठमाण्डुका लागि रशिद खानले अर्धशतकीय पारी खेले । उनले आज ३० बलमा चार छक्का र दुई चौकासहित ५२ रनको पारी खेलेका हुन् । जारी एनपिएलमा रशिदको यो दोस्रो अर्धशतक हो । 

    यस्तै, चितवनविरुद्ध सहान अराच्चिगेले ३३, विलियम बोसिस्टोले २७ र कप्तान करण केसीले २० रन जोडे । चितवनका लागि बलिङतर्फ रिजन ढकालले ३, कप्तान सिकन्दर रजा र कमलसिंह ऐरीले २–२ र डान मोस्लीले १ विकेट लिए । 

    काठमाण्डु यस संस्करणमा उच्च लयमा देखिएको छ । दोस्रो स्थानमा रहेको ऊ आज जित निकालेर शीर्ष स्थानमा उक्लिने योजनामा छ ।

    उता चितवन आफ्नो अपराजित यात्रा जारी राखेर अङ्क तालिकामा सुधार गर्ने लक्ष्यमा हुनेछ । ऊ अहिले चार खेलबाट पाँच अङ्कका साथ तालिकाको चौथो स्थानमा छ ।

    आजै भएको पहिलो खेलमा कर्णाली याक्सविरुद्ध पोखरा एभेन्जर्सले ६३ रनको जित निकालेको थियो ।