न्यूज अभियान
हरेक खबर विशेष खबर

स्याङ्जा । ऋषिपञ्चमीको अवसरमा आँधीखोलामा स्नान गर्ने क्रममा खोलाले बगाउँदा स्याङ्जाको वालिङमा एक महिलाको मृत्यु भएको छ।
मृत्यु हुनेमा वालिङ नगरपालिका–९ भूम्रेकी ५३ वर्षीया माया पाण्डे रहेकी छन्। वडा प्रहरी कार्यालय वालिङका प्रहरी नायब उपरीक्षक प्रताप पौडेलका अनुसार मंगलबार बिहान भूम्रेस्थित आँधीखोलामा स्नान गर्ने क्रममा पाण्डेलाई खोलाले बगाएको थियो।
पाण्डेलाई खोलाले बगाएपछि वडा प्रहरी कार्यालय वालिङबाट खटिएको प्रहरी टोली, जनप्रतिनिधि तथा स्थानीयवासीले खोजी गरेका थिए। खोजीका क्रममा घटनास्थलबाट करिब चार किलोमिटर तल वालिङ नगरपालिका–१३ स्थित शान्तिघाटमा आँधीखोलाको ढुङ्गामा अड्किएको अवस्थामा उनको शव फेला परेको प्रहरीले जनाएको छ।
प्रहरी तथा स्थानीयवासीको सहयोगमा शव निकालेर आवश्यक कानुनी प्रक्रिया अघि बढाइएको छ। ऋषिपञ्चमीका अवसरमा नदी तथा खोलामा स्नान गर्ने क्रममा विशेषगरी चिप्लो ढुङ्गा, तीव्र बहाव र गहिराइका कारण दुर्घटनाको जोखिम हुने भएकाले सावधानी अपनाउन प्रहरीले आग्रह गरेको छ।