न्यूज अभियान
हरेक खबर विशेष खबर

गुल्मी, ६ असोजः गुल्मीको सत्यवती गाउँपालिका–४ एक्सिङ्का कृषक फत्तमान थापाले सरकारी सेवासँगै आफ्नै पाखोबारीमा फलफूलखेती गरेर हराभरा बनाउनुभएको छ ।  सरकारी सेवामा सत्यवती गाउँपालिकामा सब–इन्जिनियरमा कार्यरत थापाले जागिरसँगै कृषिलाई  सँगसँगै अघि बढाउनुभएको छ ।

सव–इञ्जिनियर थापाले सुरुआती चरणमा करिब रु १० लाख लगानी गरी फलफूलखेती सुरु गर्नुभएको थियो । अहिले उहाँको बगैँचामा ५० भन्दा बढी प्रजातिका फलफूल तथा बहुमूल्य वनस्पति छन् । उहाँको बगैँचा व्यावसायिक कृषकदेखि कृषि विषय अध्ययन गर्ने विद्यार्थीका लागिसमेत पाठशाला बन्दै गएको छ । विसं २०५८ मा तत्कालीन जिल्ला विकास समितिबाट सरकारी सेवा सुरु गर्नुभएका थापाले इञ्जिनियरिङ सेवाका क्रममा गाउँगाउँ पुग्दा देखेको कृषि सम्भावनालाई आफ्नै गाउँमा प्रयोग गर्ने सोचलेफलफूल खेती सुरु गरेको बताउनुभयो ।

“गाउँमा केही फल्दैन” भन्ने परम्परागत सोचलाई चुनौती दिँदै थापाले आफ्नो बगैँचालाई अन्य किसानका लागि सिकाइ केन्द्रका रूपमा विकास गर्नुभएको छ । उहाँको कृषि फार्ममा अहिले प्रतिगोटा रु ४०० देखि देखि रु ५०० सम्म मूल्य पर्ने करिब ३०० वटा ड्रागन फ्रुटका बिरुवा रहेका छन् ।

त्यस्तै बगैँचामा चार रोपनी क्षेत्रफलमा ७०० बोट केरा र १०० भन्दा बढी एभोकाडो र ४४० वटा अगरउडका बोट छन् । उहाँको बगैचामा आँप, सुन्तला, मेकाडेमिया नट, लिचीलगायत विभिन्न फलफूलहरुसमेत उत्पादन भइरहेका छन् । फलफूलखेती विस्तारमा थापालाई परिवारको पनि राम्रो साथ छ । थापाले फलफूलखेतीसँगै मसला बाली, मौरीपालन र पशुपालनलाई समेत जोडेर एकीकृत कृषिमा जोड दिँदै आउनुभएको छ ।

सत्यवती गाउँपालिकाले व्यावसायिक कृषकका लागि उत्पादनमा आधारित अनुदानका कार्यक्रमलाई प्राथमिकता दिएको गाउँपालिका अध्यक्ष टीकाराम पाण्डेयले बताउनुभयो । उहाँका अनुसार स्थानीय भूगोल र हावापानीअनुसार विभिन्न प्रकारका फलफूल तथा कृषि बाली विस्तारमा जोड दिइएको छ । गाउँपालिकाको सहयोगमा स्थानीय किसानले माथिल्लो भूभागमा किवी, स्याउ, टिमुर, नास्पाती, हलुवाबेद, ओखर, सुन्तला, अलैँची र कागतीका बिरुवा लगाएका छन् । तल्लो तथा समथर भूभागमा आँप र लिचीजस्ता फलफूलखेती विस्तार गरिएको छ ।

कृषि पर्यटन प्रवर्द्धनका लागि पछिल्लो समय किवी, चिया, कफी तथा सुन्तला उत्पादनमा विशेष जोड दिइएको गाउँपालिका उपाध्यक्ष नीरमाया तरामुले जानकारी दिनुभयो ।  उहाँका अनुसार सत्यवतीको लुम्पेक क्षेत्रमा चिया तथा कफीखेती विस्तार गरिएको छ । सत्यवती गाउँपालिकाले पालिकाभित्र व्यक्तिगत, समूह, सहकारी तथा सार्वजनिक जग्गामा गरी ८३ हजारभन्दा बढी फलफूल तथा मसला बालीका बिरुवा लगाएको छ ।

किसानलाई उत्पादनमा प्रोत्साहन र स्थानीय उत्पादनको प्रवर्द्धन गर्ने योजना पालिकाले अघि बढाएको उहाँले बताउनुभयो ।