न्यूज अभियान
हरेक खबर विशेष खबर

काठमाडौं, १२ साउन । वीरगञ्जस्थित नारायणी अस्पतालमा चिकित्सक तथा स्वास्थ्यकर्मीमाथि भएको आक्रमण र अस्पतालमा गरिएको तोडफोडको विरोधमा नेपाल चिकित्सक संघको आह्वानमा मंगलबार देशभरका अस्पतालमा आकस्मिक बाहेकका सबै स्वास्थ्य सेवा बन्द भएका छन्।

संघले साउन ९ गते भएको घटनामा संलग्न व्यक्तिहरूलाई तत्काल पक्राउ गरी कडा कानुनी कारबाही गर्न सरकारसँग माग गर्दै विरोधस्वरूप ओपीडी, नियमित शल्यक्रिया तथा अन्य गैर-आकस्मिक सेवाहरू स्थगित गरेको हो।

आन्दोलनका कारण उपचारका लागि अस्पताल पुगेका हजारौं बिरामी सेवा नपाएर फर्किन बाध्य भएका छन्। आकस्मिक सेवा भने यथावत सञ्चालनमा रहे पनि नियमित उपचार, परीक्षण तथा शल्यक्रिया प्रभावित भएका छन्।

चिकित्सक संघले स्वास्थ्यकर्मीको सुरक्षा सुनिश्चित नभएसम्म आन्दोलनका कार्यक्रम थप कडा बनाउन सकिने चेतावनी दिएको छ। यता बिरामी र उनका आफन्तहरूले चिकित्सकको सुरक्षासँगै स्वास्थ्य सेवा अवरुद्ध हुँदा आफूहरू दोहोरो मारमा परेको गुनासो गरेका छन्।